autore
Diāna Skaidrīte Varslavāne
Pretspāki
tankas
Sūplok karūgam mastā
***
Japōna dūtū
Prīdes čīkuru glōstu, –
Uzbangoj dzīsme:
– Nagribi stroncijā degt,
Naroksti tukšu vōrsmu!
***
Īsmeļu sauvē
Vulkana palnus korstūs,
Uzberu sirdei.
Īsōkšu sameit kaidu,
Šī palni izdzēss pošu...
***
Deveitais viļnis!
Gleznai saplāstas buras.
Pasaslēp vysi...
– Kapteiņ, pīsīnit mani
Sūplok karūgam – mostā!
***
Izmastas krostā,
Aļges glumoj zam kōju –
Līk atsamūst maņ.
Munas tryudūšōs dūmas
Aizplyust dzelmē un izgaist.
***
Seiceņa forma –
Dūma dziļa kai jyura:
Japōnu tanka...
Pōrklōj sirdis tik maigi
Sovaidim jyutu viļnim.
***
Mūcekle asmu:
Oklō, staigoju apleik,
Nateiku īškā.
Tanka mōk sevi nūslēgt,
Reizem atsaver daila.
***
Es pūra pučei
Mōseņa tyva asmu:
Bōrines liktiņs
Kai lītūņs zemei daspīž,
Soltums gyun sirdi, prōtu.
***
Vējgrīze pļovā
Sazasmeļ saules spāka, –
Bōrines dōrgmonts.
Osoras sirdi sagyun,
Vējgrīze īceļ saulē.
***
Latgola – Mōte
Gaišōkim latv’u prōtim.
Atsadzu skustu, –
Redz, ari munu golvu
Skōruse Mōtes elpa.
***
„Rēzeknes Vēstis" –
Avīze sirdei tyva!
Skaiteita godim.
Nūsaukums? Reši mejīs,
Cylvāks tik pyrmā vītā.
***
Breineigō Mōte,
Kas tevi pīzeist, tys nōk
Pa garim celim.
Jam tu pōrsīņ rānas,
Sirdī stōdi rūzeiti.
***
– Kurs bārns Tev meilōks? –
Vaicoju cereibā es.
Mōte jau smaida:
Vysus, tic kaids voi natic,
Glōsta breineigōs rūkas.
***
Aizlidoj dzērves,
Vējs atjam bārzam rūtas,
Solna glauž zemi...
Sauleitei nūbōļ byudi.
Sirdi škeļ tukšais vokors.
***
Pērteņa myglā
Sūplok pōrteņam kyukoj,
Obim vīns sapyns:
Izlēks pļaveņā meitas,
Plykas, Mēneša vārtūs...
***
Zeileite pērklī,
Bārnuks šyupelī syltā,
Suneits iz deča...
Verās Mēness un nazyn –
Speidēt... voi nūleist koktā?
***
Zuši ap nīdrem
Bōli, gari, kacynoj?
Meituškas maudoj.
Puiši laivā ceļ airus,
Zuši lein nīdrēs, apklust.
