PRĪKŠVŌRDS

Īsōkumā beja Vōrds,
un Vōrds beja pi Dīva,
un Dīvs beja Vōrds.
Jņ.ev.1,1

Svynūt Latgolas kongresa 100. godadīnu, ceļā pi laseitōjim nōk unikals Latgolas kulturvēstures materials.

Jau divdesmit godus ar laikroksta Rēzeknes Vēstis (red. Māra Nizinska) starpnīceibu laseitōjs redz un uzzynoj, kai auguši un strōdōjuši latgalīši – cik vīnkōrša, styngra un nasatrycynoma ir jūs ticeiba Dīvam un nasavteiga mīlesteiba uz sovu dzymtū zemi Latgolu.

Pasateicūt Rēzeknes Vēstim, redaktores vītneicai Anitai Graudiņai, kura ir izauklējuse laikroksta pīlykumu Mōras Zeme, laseitōjs ikdīnā na tikai smeļ sovas tautas bogōteibas nu vēstures pyura, bet ari teik radynōts pastōveigi naaizmērst sovu dzymtū latgalīšu volūdu.

Divdesmit godu garumā Rēzeknes Vēstis ir vīneigais laikroksts, kuram ir regulars pīlykums latgalīšu volūdā. Volūda ir dzeiva un palīkūša tikai tod, kod šamā volūdā na tikai runoj, bet ari losa un roksta. Īpaši, jo roksta! Jo raksteitais vōrds ir kai akminī cērsts vōrds – tys ir palīkūšs, styprs un īdarbeigs. Mōras Zemes paveiktū 20 godu laikā navar ni izmēreit, ni izsvērt. Šymā laikā tei ir īpaša misija – nest latgaliskumu Latgolai! Tei ir lela uzadreikstēšona – uzturēt dzeivu latgaliski raksteitū vōrdu un nest tū jaunajam Latgolas cylvākam.

Šei grōmota, kurai ņyule izīt pyrmais sējums, ar Rēzeknes Vēstu pīlykuma Mōras Zeme publikacijom, aptver laika pūsmu nu 1997. leidz 2000. godam.

Lels paļdis Latgolas Kulturas centra izdevnīceibai (vad. J. Eļksnis), kas uzklauseja munu pamudynōjumu Mōras Zemes materialus apkūpōt un sagatavōt izdūšonai grōmotōs.

Vēleju, lai Mōras Zemei ir gars myužs. Lai Dīvs svētej kotru Mōras Zemes laidīni pi laseitōja! Byusim vīnōti lyugšonā!

Raimonds Krasinskis

2016. gada oktobrī